Heb 11 | KYG | STEP | Lagesa afita fatago nehuna kava'mo afole aisiya kavatefe'mo lavayagunagu huta agava ne'mauna kava'mo o'age'nona kava'mo alino lave neligeta alagi ago age'none.

Hebrews 11

Apakesa afi'a fatago hu'naya vaya'aife'mo apava gemo hu'niya gemae

1 Lagesa afita fatago nehuna kava'mo afole aisiya kavatefe'mo lavayagunagu huta agava ne'mauna kava'mo o'age'nona kava'mo alino lave neligeta alagi ago age'none. 2 Ema akeya'vilaga vaya'mogi apakesa afi'a fatago hu'naya kavateti'mo Goti'a, naulagale'mo fatago vaya'mo mai'nae, huno hapa pai'nige'a alagepa apaki'apimo ali'nae. 3 Lagaemo lagesa afita fatago nehuna kavateti'mo hutae'mo, Goti'a ge'aleti'mo ma mopagi koku'nanagi muki ne'agona ya'mogi huno no'agona yateti'mo alo hu male'niye, huta afita aeto nehune.

4 Evo'a agesa afino fatago hu'niya kavateti'mo alagepa ofalinimo Keni ofalinimo ago aeno agase'niya ofalinimo Goti'mo ami'niye. Goti'a ami'niya ofalinie'mo agesamo afino'ae'mo, naulagale'mo fatago vekamo mai'nane, huno ha pai'niye. Evo'a ago fali'niya'monanafa hemenimo agesa afino fatago hu'niya kavateti'mo ge nehiye.

5 Inoki'a agesa afino fatago hu'niya kavateti'mo ofalino afa'a mai'niye.Goti'a koku'napi'mo ago avalelino hai'niya'mofe'mo kahauya hu'nayana age'a ava ote'nae. Goti'a koku'napi'mo avalelino ohai'niya afina'mo hogoteno Inokife'mo amuse huno ate'niya'mofe'mae, huno hu'niye. 6 Amuse huno ate'niya'monanafa apakesa afi'a fatago nosaya vaya'aife'mo Goti'a amuse huno apatesiyafe'mo magoke alagepa kava'mo alagi afa'a osugae. Na kava hinage'apaene. Gotitegamo ne'vaya vaya'mogimo hu'apae'mo, Goti'a mai'niyanagetae, hu'a agaefe'mo apayamukiki hu'a kahauya hu'a age'a ava tesayafe'mo nehaya vaya'mo alagepa ya'mo alino ne'apamiye, hu'a apakesa afi'a fatago nehae. 7 Goti'a muki vaya'mogimo o'age'naya kavafe'mo Noafe'mo, ehekae, huno, hosu vaya'mo alagi ali'na hano hu'na apatalegauve, huno ha pai'nigeno Noa'a lusi kava huno amo'ya ne'aino'ae'mo agesa afino fatago hu'niya'mofe'mo afamo anaga'amogi apakufamo alino katino apatesiyafe'mo mago alopa sipimo alo hu'niye. Ani kava'mo hu'niya kavateti'mo ma mopafi vaya'aife'mo, lapakaemo hosu kava'mo nehayanagetapa faligae, huno alino apave li'niye. Agaemo Gotitegati'mo fatago kava'mo apakesa afi'a fatago nehageno alino ne'apamiya agufa fatago kava'mo ali'niye.

8 Goti'a Emalehamu'mo ami'niya kotegamo visiyafe'mo keya aeno ge hu'nigeno Emalehamu'a agesa afino fatago hu'niya kavateti'mo ani gemo afiteno ko'amo ago ataleno o'age'niya kotegamo u'niye. 9 Agesa afino fatago hu'niya kavateti'mo Goti'a polomasi gemo ha paino'ae'mo, mago mopamo haki'na kamiguve, huno ha pai'niya kotegamo alu nofi vaya'ai mopale'mo nata nenuno seli nopi'mo mai'niye. Goti'a Emalehamufe'mo, fiku kaha mae'na kamiguve, huno ha pai'niya polomasi gemo hana pai'niya vekala'mo Aisiki'e Yekopu'e'mo seli no'apifi'e no'apifi'e'mo magokepi lokae'a mai'nae. 10 Agaemo Goti'a agesamo afino alo huno faino ate'niya taonifi'mo maisiyafe'mo agava mai'niye. 11 Sela'a agesa afino fatago hu'niya kavateti'mo himamu'amo aliteno aipagu'e'mo maiteno mafa'nemo alino atesiya afina'amo ago hano hu'niya'monanafa mafa'nemo alino ate'niye. Agaemo mafa'nemo kamiguve, huno polomasi gemo huno ha pai'niya Gotife'mo, ge'age'mo hugeno o'atalegaifa alagike'mo ge'amo akame hugiya vekae, huno agesamo afi'niye. 12 Hu'niya'mofe'mo magoke vekamo ago alagi hogo'amo faligefe'mo hu'niya vekafati'mo asole aginago vaya'mo koku'nate asole kanefi'mo hane'niyanageta lekana opaige ani kahaepamo lekana opaige hisuna agufa aginago vaya'amo afole ai'nae.

13 Ani muki vaya'amogimo apakesa afi'a fatago hume hume ne'e'apae'mo fali'nae. Goti'a polomasi gemo huno'ae'mo, fiku lapa mae'na lapamiguve, huno hu male'niya ya'mo o'ali'naya'monanafa muga afagi'ale'mo hane'nige'a agete'apae'mo, aligune, hu'a magoke apakesamo afite'a ani gele'mo anuki'a alagi hu'a maigekana hu'a atafau'a alagi hu'a mai'nae. Ani kava'mo hu'a mai'ne'apae'mo, nata vaya'mo alu kotega vaya'mo mai'none, hu'a hu'nae. 14 Ani gemo nehaya vaya'mogimo, Afotimo kotegamo haita alagi maisunafe'mo lavayagunagu huta agava ne'maune, hu'a ha le'a hapa nepaiye. 15 Apakaemo atale'a e'naya kotegae'mo apakesamo afi'naesinana halate ai'a atagi ne'a u'naesina'monanafa 16 alagepa ko'mo aeno agase'niya koku'na kotefe'mo hapau'niye. Goti'a maisaya taonimo alo huno apate'niya'mofe'mo Gotitimo'mo mai'niye, hu'a agi ne'aya gelefe'mo avagage nosiye. 17 Goti'a Emalehamu'mo amalageka hu'nigeno'ae'mo agesa afino fatago hu'niya kavateti'mo mafa'ne'amo Aisiki'mo amagino ofalinimo ami'niye. Polomasi gemo afi'niya vekamo'a magoke mafa'ne'amo amagino ofalinimo ami'niye. 18 Goti'a ani mafa'neke'mo,Aisiki vayapati'mo kaginago vaya'mo maigae, huno hu male'niye. 19 Agaemo, Goti'a himamu'aleti'mo falisiya kavategati'mo afa'a alino he tino ategaiye, huno agesamo afiteno'ae'mo aune kava'mo huno fali'niyateti'mo halate avale'niye.

20 Aisiki'a agesa afino fatago hu'niya kavateti'mo afole aisiya kavatefe'mo Yekopu'e Iso'efe'mo, Goti'a lahana maeno, huno hana pai'niye. 21 Yekopu'a agesa afino fatago hu'niya kavateti'mo faligefe nehuno'ae'mo Yosefe mafa'nelafe'mo, Goti'a lahana maeno, huno hana paiteno hayopa kayo'amo alino hayopa faino mai'neno Gotife'mo mono hu'niye. 22 Yosefe'a agesa afino fatago hu'niya kavateti'mo faligefe'mo nehuno'ae'mo Isaleli vaya'aife'mo, Isipi koteti'mo ataletapa ugefe hisaya afina'mo kanolufati'mo nayamufa'nimo hatita alinitutapa kita nateyo, huno hapa pai'niye.

23 Mosese'a ita'afo'ala'moganimo ali'ana atete'anae'mo, alagepa mafa'nemo mai'niye, hu'ana age'na'a'mofe'mo anakesa afi'ana fatago hu'na'a kava'anileti'mo lole'e mago'e kaimo maisiyafe'mo ali'ana fala ki'ana ate'na'ae. Anakaemo kini vekamo'a hu male'niya ke'aepa ge'amo amagi'ana atalesa'afe'mo koli osu'na'ae. 24 Kini vekamo agi'amo Felo a'mafa'nemo'a Mosese'mo yagaino ate'nigeno Mosese'a ko sino alopa heteno'ae'mo agesa afino fatago hu'niya kavateti'mo, Felo a'mafa'nemo mafa'ne'amo o'mai'nove, huno hu'niye. 25 Agaemo Goti vaya'amogi'e'mo magokepi kana ya'mo alisiyafe'mo hau'nigeno'ae'mo hosu kava'mo huno aise afina'mo amogaga aino maisiya kavafe'mo ohau'niye. 26 Agaemo Goti'a amisiya miyafeke'mo agesamo afi'niya'mofe'mo, Kalaisi agi'alefe'mo hu'a faipa hu'a natesaya kava'mo hogote kanale kava'mo hane'nigeno Isipi kote kagemi ya'e konali ya'e'mo henaga ya'mo ina agufa ya'mo hane'niye, huno agesamo afi'niye. 27 Kini vekamo'a aipamo leno ate'niya'monanafa Mosese'a agesa afino fatago hu'niya kavateti'mo koli osuno Isipi kotegati'mo ataleno u'niye. Agaemo no'agaya vekamo ageteno'ae'mo ge'ale'mo o'ataleno atafauno alagi huno mai'niye. 28 Agesa afino fatago hu'niya kavateti'mo Isipi vaya'ai yege mafa'ne'apimo kamiti apamagi'niya enisole vekamo'a Isaleli nofi vaya'ai yege mafa'ne'apimo o'apamagisiyafe'mo Pasova kava'mo hutapa sipisipimo apamagitapa kola'aleti'mo kipa yosatapile'mo faleyo, huno hapa pai'niye. 29 Isaleli vaya'mogi apakesa afi'a fatago hu'naya kavateti'mo haesa solovala ani'mo aino akaka vae'nigeno folagapi'mo hau hu'niya mopale'mo u'nae. Isipi kotega vaya'mogimo vegala aeli u'apae'mo amalageka hu'a ani'mo nelakageno'ae'mo ani'mo'a ago aeno apati kae'niye.

30 Isaleli vaya'mogimo apakesa afi'a fatago hu'naya kavateti'mo Yeliko taonifi'mo u'a seveni'a afina'mo ai'a vego hu'a ne'ageno'ae'mo yafa kegi'yamo aino nakupaeno asagauno ai'niye. 31 Lehepi'a kumai a kanomo'mo agesa afino fatago hu'niya kavateti'mo apamasa hisa'afe'mo e'na'a vekala'mo alino falu fala huno anate'nige'apae'mo Isaleli vaya'mogi apakesa afi'a fatago osu'naya vaya'mo hapaete'a Lehepi'mo afa'a atageno mai'niye.

32 Mago'e hu'na apava gemo hisufiye. Nagaemo Gitiyoni'agi Malaki'agi Samisoni'agi Yefeta'agi Nevini'agi Gotitegati gemo alini e'a ae'a hakalo hu'a hapa nepaiya vaya'aifenagi hu'na apava gemo hu'na avo'mo kaesuva afina'nimo ohane. 33 Apakaemo apakesa afi'a fatago hu'naya kavateti'mo alu nofi vaya alu nofi vaya'ai ati vaya'api'e'mo kame hu'a ae'a apakase'nae. Apakaemo vaya'ai kava'apimo ali'a fako hu'a apate'nage'apae'mo alagepa kava'mo hu'nae. Goti'a polomasi gemo huno'ae'mo, fiku lapa mae'na lapamiguve, huno hu male'niya ya'mo ago ali'nae. Afela laiyonimogimo hapaesaya kava'mo hu'naya'monanafa apakesa afi'a fatago hu'naya kavateti'mo apavayale'mo alino akani'niye. 34 Lusi atamo'a leno apasagalisiya agufa atamo ae'a yu he'a atale'nae. Vaya'mogi naipeleti'mo apai'a ki'a apatesayafe'mo apai'nayana apai'a kasalo pae'nae. Apayamufa no'valaya vaya'mogi apayamufa vaya'mo hamale'nae. Koli osu'a lokiya vai'a kame hu'a alu nofi ati vaya'mo hapa fai'a hapaetalage'a u'nae. 35 Goti'a apakesa afi'a fatago hu'naya kavateti'mo mafa'ne'apimo fali'nayateti'mo halate alino he tino apate'nige'a ita'apimogimo halate apavale'nae.

Hu'naya'monanafa mago'amo apakafu ki'nige'a fali'nae. Kame vaya'apimogimo, lapakaemo atalesayana afa'a hatu maeta lapategaune, hu'a hapa pai'nage'apae'mo kanolufati'mo he ti'apae'mo maige maige hu'a maisaya kavafe'mo apakesamo afite'apae'mo, o'atalegaune, hu'a hu'nae. 36 Mago vaya'amogimo mago apakesa afi'a fatago hu'naya vaya'aife'mo hu'a faipa hu'a apatete'a nofi kayoteti'mo apamagi'nae. Mago vaya'amogimo mago apakesa afi'a fatago hu'naya vaya'mo seli nofiteti'mo ki'a apatete'a kalavusi hu'a apate'nae. 37 Yafa kayoteti'mo apamagige soteti'mo apakufamo vasagali'a atalege hosu kava'mo hisayafe'mo apamalageka huge naipeleti'mo apai'a ki'a apatege hu'nae. Kukena'apimo ohane'nige'a sipisipi agufamo ali'a vaige meme agufamo ali'a vaige hute'a umenitata hu'a mai'nae. Kagemi ya'apimo alagi ohane'nige'apae'mo apaini hu'a apatete'a apakaetegamo hosu kava'mo hu'nage'a mai'nae. 38 Ma mopafi vaya'mogimo apakae'e'mo magokepi alagi lokae'a maisaya agufa vaya'mo o'mai'nae. Nata vaya'mo mai'ne'a ka'me kotega umenitata hu'a maige avelegamo umenitata hu'a maige yafa kapi'mo u'a maige kelifi'mo u'a lami'a maige hu'a mai'nae. 39 Goti'a muki vaya'amogimo apakesa afi'a fatago hu'naya kavateti'mo naulagale'mo fatago vaya'mo mai'nae, huno hu'niya'monanafa Goti'a polomasi gemo huno'ae'mo, fiku lapa mae'na lapamiguve, huno hu male'niya ya'mo o'ali'nae. 40 Goti'a lagaefe'mo, aeno agase'niya ya'mo ali'na lapamiguve, huno agesamo afi'niye. Apakai'apige'mo apaote'mo hai'a ohapaigafa lagae'e'mo magokepi'mo haita hapaisunafe'mo agesamo afiteno hu male'niye.